საქართველოს მთავრობის ადმინისტრაციის ადამიანის უფლებათა სამდივნოს უფროსის მოადგილე
ელისო შონია ადამიანის უფლებათა სამდივნოს გუნდს 2021 წლის ივლისის თვეში შეუერთდა. 2011 წელს დაამთავრა ივანე ჯავახიშვილის სახელობის თბილისის სახელმწიფო უნივერსიტეტის იურიდიული ფაკულტეტი.
2012 წლიდან მუშაობდა შინაგან საქმეთა სამინისტროში, სხვადასხვა პოზიციებზე, კერძოდ იყო: საერთაშორისო ურთიერთობების დეპარტამენტის ევროატლანტიკურ სტრუქტურებში ინტეგრაციის სამმართველოს მთავარი სპეციალისტი, ადამიანის უფლებათა დაცვისა და გამოძიების ხარისხის მონიტორინგის დეპარტამენტის განსაკუთრებით მნიშვნელოვან საქმეთა ინსპექტორი, ხოლო უკანასკნელი ორი წლის განმავლობაში - დროებითი მოთავსების უზრუნველყოფის დეპარტამენტის დირექტორის მოადგილე.
საჯარო სამსახურში მისი მუშაობის გამოცდილება უკავშირდება, ადამიანის უფლებების დაცვის სფეროში საერთაშორისო ხელშეკრულებებით ნაკისრი ვალდებულებების შესრულების მონიტორინგს, ამ პროცესში ხარვეზების გამოვლენას და აღმოფხვრის მიზნით რეკომენდაციების და სხვადასხვა სახელმძღვანელოების შემუშავებას, თანამშრომლებისთვის სწავლებების ორგანიზება/ჩატარებას, ასევე შესაბამისი სამოქმედო გეგმებისა და ანგარიშების მომზადებას.
მონაწილეობა აქვს მიღებული დონორ ორგანიზაციებთან თანამშრომლობით განხორციელებულ არაერთ პროექტში; მათ შორის აღსანიშნავია ევროპის საბჭოს ორწლიანი პროექტი - „თავისუფლებააღკვეთილ არასრულწლოვან და ზრდასრულ პირთა უფლებების დაცვის ხარისხის გაუმჯობესება“, რომლის ფარგლებშიც ჩატარდა არაერთი აქტივობა დროებითი მოთავსების იზოლატორებში არსებული პირობების გაუმჯობესების, დაკავებულთა სამედიცინო მომსახურების სრულყოფის და თანამშრომელთა კვალიფიკაციის ამაღლების მიზნით.
გავლილი აქვს პარტნიორი საერთაშორისო ორგანიზაციების მხარდაჭერით ჩატარებული არაერთი სწავლება ადამიანის უფლებების დაცვის მიმართულებით, მათ შორის საზღვარგარეთ.
სრულყოფილად ფლობს ინგლისურ და რუსულ ენებს.